الثلاثاء، 25 أغسطس 2015

وبعض البشر

بعض البشر لا قال كلمه سمعناه
وبعض البشر ما نسمعه لو ينادي

وبعض البشر لو غاب لحضه فقدناه
وبعض البشر لو غابت سنين عادي

وبعض البشر لا راح عنّا لحقناه
لو بينا وبينه ثمانين وادي

وبعض البشر لو ما قعدت انت واياه
ان قلت : وينك ؟ قال : بين الايادي

وبعض البشر في ساعة الفود نلقاه
وبعض البشر لا فادنا ولا استفادي

وبعض البشر مركى هل الطيب مركاه
وبعض البشر مركاه بين النوادي

وبعض البشر يقعد مع اجواد شرواه
وبعض البشر مـ يعرف معنى الاجوادي

وبعض البشر يمسوي بربعه سواه
مثل سوايا اهل النجف بالرمادي

وبعض البشر مــ يعرف معنى المعاداه
وبعض البشر طبعه معادي معادي

وبعض البشر دايم على الخير مسعاه
وبعض البشر مسعاده خبص العبادي

وبعض البشر ما يندرى وين ممشاه
مثل الفحل لا صار وقت الهدادي

وبعض البشر واللـــه لو يسرح بشاه
الا يغدي ولا يندرى وين غادي

وبعض البشر لو مات عايش بذكراه
وبعض البشر ذكراه وقت الحدادي

وبعض البشر عقب العزا بيوم ننساه
وبعض البشر نلبس عليه السوادي

وبعض البشر لو ربنا بس خلاه
الا يغدي سيد ع كل السيادي

وبعض البشر مع العمد لو رفعناه
يرجع بعد يومين مع الوتادي

وبعض البشر روس العلالي توطاه
وبعض البشر من قاع وادي لوادي

وبعض البشر ما تنطق العيبه اشفاه
وبعض البشر العيب امر اعتيادي

وبعض البشر نص الدلو صعب يملاه
وبعض البشر محيط هندي و هادي

وبعض البشر ما يغيّر الوقت مبداه
وبعض البشر مـ يعرف معنى المبادي

وبعض البشر لا هدّ ما الله اهداه
هدات صقر مكيس وقت الهدادي

وبعض البشر بين الحضر والبدو تاه
لا اهل الحضر عرفوه ولا اهل البوادي

وبعض البشر مــ تعرف وجهه من قفاه
ولا يلبس الا ثوب لونه رمادي

مراه في وجهك واذا اقفيت مذراه
يضحكلك وكرهه على الوجه بادي

وبعض البشر في سوق الاجواد تلقاه
ما يسوى قرش ونص حسب اعتقادي

وبعض البشر والله والله والله
لو ينشرى بمليون تشريه عادي

هذي هي افعال الزمان وسواياه
الدوني دوني والريادي ريادي

الكفو يلقاله خوي كفو يكفاه
واللا الردي يزبن على كل حادي

المرجله والطيب والدين والجاه
جناد للي ما لقاله جنادي

واللي قضب حبل المراجل بيمناه
لو هو على راس النقب ما يدادي

ويلاه يابعض الرجاجيل ويلاه
راحت وعَـقب النار دايم رمادي

هذي عطايا اللي كثيره عطاياه
من يوم درو السيل شق البلادي

وما كل من عدا عن السيل عداه
ولا كل من صوب على الصيد صادي

يا جانين الخيل شوفو مزاياه
ويامريحينه عقب كثر الطرادي

من كسر اشداده على صيد يرجاه
ما نفعه ان ما صاد كسر الشدادي

واللي رمى كلمه على غير معناه
مثل الطلق من بعد ضغط الزنادي

واللي زرع بذره من الخير يجناه
ولكل بذرة خير موسم حصادي

ويلي شريت الجدر خلك من غطاه
الجدر ما يركب بدون الهوادي

ويلي اتمنى الشي ليه اتمناه
رزقك وعمرك عند رب العبادي

من عز نفسه وين ما راح يلقاه
ومن باعها باع الركب والعتادي

صحيح ان النفس دايم مبدّاه
وصحيح ما يبدا على النفس بادي

بس البلى للي زمانه تولاه
وانه بوادي وابن عمه بوادي

posted from Bloggeroid

ليست هناك تعليقات:

إرسال تعليق